تعافيت بك ف54 ج2 – رواية تعافيت بك PDF
الجزء الثاني
الفصل الرابع والخمسون (الموعد المضبوط)
“سكنت الراحة بين أضلعي..
و بِتُ قرير العين بأدمعي…”
_________________________
“الراحة”
تلك الكلمة التي تكونت من عدة أحرف بسيطة وبين ثناياها احتوت على كل المعاني التي يحارب المرء للحصول عليها، وللحق يظل المرء منا مُحاربًا حتى يحصل على الراحة في حياته قبل أن يصل إلى مماته، وإذا دُقق الوصف لتلك الكلمة سنجد أن الراحة قد تكمن في حصولك على ما تمنيته، أو في وصلك لمسلكٍ توهت في عتمته، أو في إنارة طريقٍ سرت في ظلمته، اختلفت المعاني وتعدد الوصف وفي النهاية تكون الراحة في حصولك على ما رجوته وكأنك لن تستطع التحمل بدونه.
في شقة “ياسين” دلفها مع زوجته حتى تنهدت هي براحةٍ وقبل أن تتفوه بكلمةٍ واحدةٍ وجدته يتحدث من خلفها بنبرةٍ جامدة يُحذرها من القادم:
“عارفة لو نطقتي وقولتي جُملتك النحس دي هعمل فيكي إيه؟! هــبـلـعـك”
حركت رأسها موافقةً ثم رفعت كفيها تحاصر فمها حتى لا يفتضح أمرها وتضحك أمامه على طريقته تلك، فرمقها هو بحنقٍ ثم أغلق باب الشقة، انتظرت هي حتى دلف هو للداخل ثم أطلقت العنان لفمها وهي تقول:
“يـــاه أخيرًا وصلت شقتي؟!”
ضحك بيأسٍ منها بعدما استمع لجملتها ثم دلف للغرفة وهي خلفه وبعد مرور دقائق بدل كليهما ثيابه وقبل أن يتركها ويدخل الغرفة، تحدثت هي بصوتٍ عالٍ:
“خد يا بني هنا رايح فين !! تعالى شوف هناكل إيه أنا جعانة”
جلس بجانبها من جديد وهو يسألها بتعجبٍ:
“جعانة !! مش كلتي في القاعة ومرضيتيش تخرجي معايا علشان كنتي بتاكلي؟!”
ردت عليه هي بسرعةٍ:
“ما هو حضرتك قومتني وأنا لسه مكملتش أكلي”
زفر هو بقلة حيلة ثم تحدث على مضضٍ:
“نعم !! تاكلي إيه بقى؟! ومتخترعيش ليا، اطلبي حاجة نقدر نعملها وفق الموار المتاحة”
ردت عليه هي بسخريةٍ:
“إيه دا !! ناقص تقولي بم تفسر سقوط الدولة العثمانية، موارد متاحة مين؟! أكلني يا ياسين وخلص”
ضحك على طريقتها الساخرة ثم سألها من جديد:
“تاكلي إيه يا ست أنتِ انجزي !! عاوز أنام لسه بكرة هنروح عند ميمي وبعدها نبارك لوليد وطارق وليلة كبيرة، والجمعة ساعتها بتكون قليلة”
صفقت بكفيها معًا وهي تقول بحماسٍ:
“عرفت !! إحنا نحمر بطاطس ونجيب مخلل وبالذات الزيتون اللي أنتَ مخبيه مني ها !! هاته بقى علشان ناكله بسرعة قبل ما أنام وأنا جعانة وذنبي يبقى في رقبتك”
أمسك رسغها يسحبها خلفه وهو يقول بعدما اعتدل واقفًا:
“معايا بقى يا حلوة علشان تعملي الأكل معايا، وقشري البطاطس أنتِ وأنا هظبط الباقي”
تحدثت هي مسرعةً:
“طب ما تخليك جدع وتعمل الأكل أنتَ وأنا هدعيلك ربنا يكرمك”
سحبها خلفه بقوةٍ وهو يغمغم بعدة كلمات غير مفهومة تكاد تكون مُبهمة، لكنها التقطت من بين تلك الحروف:
“صبرني يا رب على الله أنا فيه”
تحدثت هي بضجرٍ منه:
“يصبرك على إيه يا بني !! متجوز ابتلاء؟! ما تحترم مشاعري ووجودي”
التفت لها يسألها بثباتٍ:
“عاوزاني احترم مشاعرك ووجودك !! طب حلو، أكلي نفسك بقى يا كتكوتة”
شهقت بقوةٍ ثم أمسكت يده وهي تقول بتوسلٍ:
“اقف بص متبقاش قفوش كدا، أكلني الأول وبعد كدا روح نام، متبقاش قماص بقى”
ضرب وجهه بكفيه معًا ثم سار خلفها للمطبخ وهي تسبقه بمرحٍ وبعد مرور ثوانٍ كان هو يقوم بتقطيع الخضروات وهي على الطاولة تقوم بتجهيز” البطاطس” فاقترب هو يجلس مقابلًا لها حتى وجدها تقول بحالمية:
“كان حلم من أحلام حياتي اتجوز واحد علشان نطبخ أنا وهو سوا بليل كدا، أحلام هطلة والله بس بحبها”
ابتسم لها ثم قال بنبرةٍ هادئة:
“الفكرة إن الحاجات دي بقت قليلة ونادرًا لما نشوفها، يعني عادي واحد يساعد مراته وعادي إنه يشتغل معاها شغل البيت، اللي مش عادي بقى أني كراجل أشوف نفسي كبير على الحاجات دي وأنسبها للست، هو دا بقى الهطل”
ابتسمت له وهي تقول بتأثرٍ مصطنع:
“و الله العظيم محتاجين نعمل نسخ منك ونوزعها، روح ربنا يكرمك يا شيخ”
ابتسم لها أكثر من قبل ثم أضاف:
“و على فكرة أنا وعامر وخالد وياسر كدا، مش أنا لوحدي يعني علشان مبقاش مثالي بالنسبة ليكي”
سألته هي بدهشةٍ:
“بجد !! يعني مش لوحدك اللي كدا؟! ولا علشان أنتم شلة واحدة؟!”
رد عليها مُفسرًا:
مش علشان شلة واحدة ولا حاجة، بس ظروفنا كانت كدا وخليتنا نضطر نتعامل كدا ومع الوقت اتعودنا، يعني أنا كبرت لقيت رياض بيساعد زُهرة، فاتعلمت أنا كمان اساعدهم، وياسر لما أخواته اتجوزوا اضطر هو يساعد مامته وبقى بيعمل معاها كل حاجة، وعامر طول عمره بيساعد مامته، وخالد لما كانت اخته في ثانوية عامة كان هو اللي بيساعد مامته، وقبلها كنا بنتعلم علشان ميمي، أنتِ بقى بنت محظوظة علشان أطلع أنا من نصيبك”
وضعت كفها أسفل ذقنها وهي تقول بنبرة صوتٍ هائمة:
“و أحلى نصيب والله”
رفع حاجبيه لها بغير تصديق فوجدها تتنهد بعمقٍ ثم عادت لما كانت تفعله وهي تبتسم بسخريةٍ وتعبيرات وجهها تتبدل وكأنها تتحدث مع نفسها، فسألها هو بتهكمٍ:
“مالك يا هطلة !! كشرتي ليه مع نفسك؟أنتِ ملبوسة يا خديجة؟”
ردت عليه هي مُردفةً بمرحٍ:
“مرة زمان كان نفسي اتخطب وخطيبي يزعلني علشان كان فيه أغاني حزينة نفسي أسمعها وأتأثر بيها، واتخطبت واتجوزت ومسمعتش الأغاني اللي كنت عاوزة أنكد على نفسي بيها”
