تبسيط الدفاعيات (1) | من الذي مات على الصليب؟ اللاهوت أم الناسوت؟
من الذي مات على الصليب؟ اللاهوت أم الناسوت؟
اللي بيطرح السؤال ده بيكون غرضه إحراجك!، يعني أية؟ أقول لك، لو أنت قلت اللاهوت هو اللي مات، يرد ويقول لك، هو اللاهوت بيموت؟ وجيب لك آيات من الكتاب المقدس أن الله لا يموت!، طيب ولو رديت وقلت: الناسوت هو اللي مات؟ هايرد يقول لك، إذن الفداء كده محدود لأن الناسوت المحدود هو اللي مات، يبقى أية لازمة قصة الفداء دي بقى؟
طبعا السؤال فيه خطأ منطقي أنت وقعت فيه، أية هو؟ أنك حصرت نفسك في الإجابات اللي هو مقدمها لك، وهى “الناسوت” و”اللاهوت” وده مقدماً غلط! لأن مش لازم يقدم لي الإجابات اللي انا اختار منها، ممكن يكون الإجابتين غلط! وده الحاصل هنا فعلا! الإجابتين غلط!
ليه؟ لأن مافيش حاجة أسمها لاهوت لوحده أو ناسوت لوحده بعد الإتحاد المعجزي، ولو فاكرين أننا بنقول “لاهوته لم يفارق ناسوته لحظة واحدة أو طرفه عين” فاكرين؟
طيب المهم، أية بقى الإجابة على السؤال ده؟
الإجابة هى: الناسوت المتحد باللاهوت
يعني أية؟ تعالى نفهمها
المقصود بالرد ده أن فعل الموت نفسه يقع على الجسد (الناسوت) لأنه من خواص الناسوت، فمن خواص الناسوت الموت والأكل والشرب والغضب والفرح …إلخ، فالموت وقع تأثيره على الناسوت، لكن اللاهوت كان متحد بالناسوت لما مات، فهل ده معناه موت اللاهوت والناسوت؟ لأ، ده معناه أن لما الناسوت مات كان متحد باللاهوت، أمال أية فايدة إتحاد اللاهوت بالناسوت طالما ماماتش، وبرضو إزاي إتحقق الفداء غير المحدود؟
اللاهوت غير المحدود أعطى لموت الناسوت المحدود، لا محدودية في الفداء، يعني ببساطة اللاهوت خلى موت الناسوت يفدي كل الناس، طيب عشان نوضحها بمثال بسيط (مش مطابق) لو ضربنا 1 في 1000 = 1000 ولو ضربنا 1 في 1000000 = 1000000، طيب لو ضربنا 1 في ∞ (مالانهاية) = ∞، فهنا الـ 1 هو الجسد، وهو قليل ومحدود والـ ∞ هى (مجازاً مجازاً) اللاهوت، فضرب الواحد في المالانهاية أعطانا نتيجة مالانهاية….
حد مش فاهم حاجة؟
#تبسيط_الدفاعيات
فريق اللاهوت الدفاعي
تمام النقطه واضحه بس عندي سؤال
ايه دور الروح القدس في الفداء؟
و ازاي الابن يقدم نفسه ذبيحه للاب لما هما الاتنين متحدين ببعض وقت الموت ؟؟
سؤال حضرتك بيوضح أن حضرتك عايزة تقرأي أكثر في عقيدة الثالوث، الروح القدس لم ينفصل عن الآب والإبن لكي نسأل عنه بشكل منفصل، يعني لما نقول ان اللاهوت متحد بالناسوت، فنحن لا نقصد أن جزء من اللاهوت وهو الإبن هو المتجد فقط بالناسوت ولكن الجزأن الأخران وهما الآب والروح القدس غير متحدين، اللاهوت لا يتجزأ، لكن لو تقصدي أية عمل الروح القدس في تأثير الفداء، فدوره معروف، إقرأي هنا بعض من دوره ثم نكمل لو أردتي: http://st-takla.org/Full-Free-Coptic-Books/FreeCopticBooks-008-Anba-Metropolitan-Bishoy/002-Tabseet-El-Iman/Simplifying-the-Faith__190-Adventists-VS-Jesus_30-Trinity.html
الإبن قدم نفسه عن طريق أنه أخذ جسد إنساني وإتحد به ووحد جسده مع لاهوته، ثم قدم بموت الجسد المتحد باللاهوت فداء وخلاص وثمن غير محدود للاب، وقت الموت حدث إنفصال بين الروح البشرية في السيد المسيح وبين الجسد، لكن اللاهوت كان متحدا بالروح البشرية والجسد…
فريق اللاهوت الدفاعي بس من فتره تم عرض كل ما يتعلق بالفداء و كان من اهم ما ورد ان الفداي مفيش رد دين للاب و لكن الاب اراد ان يجدد طبيعه الانسان و يردة الي مرتبته الاول و يعالج فساده لكن مفيش خطيه غير محدوده موجهه الى الله اللغير المحدود لان دي نظرية انسلم اللي بنرفضها يبقى ليه فيه دين او ذبيح
انا مشتته جدا في الموضوع ده و مش عارفه ده بسبب جهلي و لا فيه امور غامضه عليا رغم اني قريت تجسد الكلمه و معظم المقالات اللي بتعرضوها بس لحد النقطه دي و مش قادرة اوصل لاجابه تريحني
Rasha Ekladios ثواني يا أختنا،
1. فين من الموضوع اللي بتتكلمي عليه؟
2. فين أنا قلت موضوع خطية غير محدودة أو الله غير محدود؟
3. انا ما قلتش "دين" للآب، دا حضرتك اللي قلتي، أنا قلت "الإبن قدم نفسه عن طريق أنه أخذ جسد إنساني وإتحد به ووحد جسده مع لاهوته، ثم قدم بموت الجسد المتحد باللاهوت فداء وخلاص وثمن غير محدود للاب، وقت الموت حدث إنفصال بين الروح البشرية في السيد المسيح وبين الجسد، لكن اللاهوت كان متحدا بالروح البشرية والجسد…"
4. حضرتك مشكلتك أن معلوماتك عن الموضوع ده قليلة جدا وحتى الموجود من المعلومات هو مشوش أو خاطيء، وأعتقد انك مش بتقرأي بتركيز.
فريق اللاهوت الدفاعي هو ليه حضرتك انفعلت انا مجرد واحده عايزة تفهم حاجه …عموما شكرا جزيلا الاجابه رقم 3 افادتني جدا و على فكرة انا بقرا بتركيز بس انا قلت لحضرتك اني مشتته بخصوص الامر ده بس و كنت محتاجه اجابه واضحه او مرجع او مقال تفهمني الابن قدم نفسه ازاي … شكرا جزيلا على الافاده..و بعتذر على الازعاج
Rasha Ekladios بالعكس، أنا ما انفعلتش أبدا، انا هاديء جدا جدا، اية اللي خلاكي تقولي أني انفعلت؟
فريق اللاهوت الدفاعي اسوأ اسلوب جدال بيقوم على اني اقولك انك معلوماتك ضعيفه او مش بتقرا كويس و كانك بتحسسه انه مش فاهم حاجه و ساعتها ممكن يبطل خالص يسال عن اي تساؤول بيدور في ذهنه …حط .في دماغك ان الانسان ده ممكن يكون فعلا غرقان و محتاج الللي ينقذه المفاهيم اللاهوتيه للي بيدرسها لاول مرة بيكون فيها صدمات كتير احنا ممكن نكون اتربينا على عكسها و اكتشافات جديده … واللي لسه بادي يقرا و يفهم مبقالهوش سنه بيبقى محتاج دعم و اجابات واضحه و صريحه لانه ممكن يبقى وصل لباب مسدود و من هنا ممكن ينطلق للالحاد لانه مش فاهم مع الاسف انا عاصرت ناس كتير تعبت لان مش بتلاقي ردود تريحها و يتحرج تسال بعدين تبان جاهله
على فكرة انا باخد كورس الحاد و متابعه كل مقالاتكو و الكتب اللي بتنزلوها و بستني فعلا كل يوم بتنزلو ايه و كل ده مفيد جدا فعلا و احنا في امس الحاجه ليه اليومين دول …اسفه على الاطاله و شكرا جزيلا …
Rasha Ekladios يا أستاذة كل الكلام اللي قلتيه دا احنا عارفينه، المشكلة دلوقتي اني راجعت كلامي كذا مرة وحاولت افهم ازاي إعتبرتي كلامي ده سيء او هجوم أو جدال معاكي، ومش عارف، فبعتقد أن كلامي إتفهم غلط لانه بالكتابة مش بالصوت!
اية السيء في كلامي؟
حضرتك إتكلمتي عن موضوع فسألتك عنه عشان أراجعه، حضرتك تكلمتي في موضوع خطية غير محدودة والله غير محدود فسألتك عن المكان اللي انا قلت فيه الكلام ده، ده سؤال إستفساري مش جدلي ولا اي حاجة من الكلام ده
انا قلت لك اني ماقلتش "دين للآب، ولكن نسخت لك اللي كتبه مرة تاني وحضرتك فهمتيه في المرة التانية
حضرتك بنفسك قلتي "انا مشتته جدا في الموضوع ده و مش عارفه ده بسبب جهلي و لا فيه امور غامضه عليا"، ده كلامك مش كلامي أنا، لكن انا حسيت من خلال حوارك أن معلوماتك قليلة عن الموضوع ده، وده مش عيب، والمعلومات الموجودة مش واضحة لك او مش صحيحة، واما عن التركيز فده لأنك تكلمتي في حاجتين انا ماتكلمتش فيهم وماوصلكيش معنى كلامي في المرة الاولى ولكن التانية، زائد اننا كأقباط مش متعودين على قراءة كتب الآباء كدراسات بل كأقوال مفيدة للحياة الروحية فمش بيكون تركيزنا كامل في القراءة دايما
عموما انا مش قصدي اضايقك ولا قصدي اقول في حقك اي كلمة مش كويسة
لو هم متحدين ازاي واحد مات والتاني لأ ؟ وسؤال تاني روح المسيح تبع ناسوته ولا لاهوته ؟ ومين قال ان ناسوته لم يفارق لاهوته لحظة واحدة ؟ وبعدين بما ان الناسوت هو اللى مات مش ربنا بيفتقد ذنوب الاباء في الابناء اذن فالذنوب الخاصة باجداد مريم كانت موجودة في الناسوت وبالتالي الكفارة تحمل خطية
الروح لا يموت ……الموت هو انفصال الروح عن الجسد……الله اتخذ جسد ……اصبح ظاهرا لنا فى هذا الجسد……وغير ظاهر لنا فى نفس الوقت فى الكون كله……حينما مات الله المتجسد على الصليب…..انفصلت روحه عن جسده ….وبقى لاهوته متحد مع روحه وايضا مع ناسوته ……ثم لانه هو الله خالق الموت وخالق الحياه……بكل بساطه كما اسلم الروح باراده لاهوته…..ايضا اعاد روحه الى جسده بارادته ايضا.